Өндөр их өвөг дээдсээс Өв болон ирсэн яс мөлжих уламжлалыг сэргээн дэлгэрүүлэх зорилгоор Хүннүгийн болон хүрлийн үеийн бөгтөр хутганы хэлбэрийг эш болгон тусгайлан бүтээсэн “ӨВ” загварын хутганы хэлбэрийг хадгалж, хэмжээг зохистой хэмжээнд томруулж аялал, зугаалгын үед Таны үнэнч “АНД” байхаар тооцож бүтээв.     
Өвчих, шулах, үе нугалах зэрэг үйлдэл хийхэд эвтэй, нийцтэй байхаар хутганы ирний болон нийт уртын хэмжээг тооцож цул ган хийцийн төгсгөл хэсэгт архирч буй барын дүрслэлтэй бөглөө онгойлгогч хийж өгсөн дизайны шийдэл нь гайхалтай. 
225 мм урттай 4 мм-ийн зузаантай цул ган дээр шинэ зууны технологийн дэвшлийг бүрнээ шингээсэн, орчны нөлөөнд өндөр тэсвэртэй G-10 буюу өндөр нягтралтай шилэн давуун материалыг хавсарч ишилснээр энэ загварыг ажиллах чадварыг үлэмж нэмэгдүүлсэн гэж болно. Түүний дээр ишний барьцалдалтыг сайжруулах зорилгоор хутганы ишэнд чулуун зэвсгийн үеийн хийцийг санагдуулам талст бүхий гадаргуу үүсгэж өгсөн нь “АНД” хутганы хэлбэр хийцтэй донж хослол төгс зохицсон.
Барын толгой л ил гарах хэмжээнд хутгаа лав хуйлах тул хутга гээгдэх эрсдэл үгүй. Бүсэндээ зүүсэн хутгаа нүд ирмэхийн зуур хуйтай нь хамт салгаж авах боломжтой. Энэ боломжийг Германы FIDLOCK системийн оньсоор тайлагдах 70 кг -ийн даацтай бат найдвартай түгжээ олгох болно.
Аливаа хутганы гол үндсэн үүрэг нь хэрчих, огтлох, хуваах. Энэ үүргийг гүйцэтгэдэг гол зүйл нь мэс буюу ирний хэсэг. Хутганы чанарыг илтгэх гол үзүүлэлт бол ирний гангийн чанар юм.

Энэ удаад бид аялалын “АНД” -ыг хоёр төрлийн гантайгаар танилцуулж байна.    

1. ELMAX маркийн ган /1960-аад оны үед суурь машины таслагч, огтлогч хэсэгт ашиглах зорилгоор гарган авсан, өдгөө Шведийн “Uddeholms AB” компанийн үйлдвэрлэн гаргадаг зэврэлтэд өндөр тэсвэртэй, ир хадгалах чадвар сайтай ган/

2. 100Х13М маркийн ган /Мэс заслын хутга хийх зорилгоор Златоустын металлургийн үйлдвэрт тусгайлан гаргаж авч 1981 оноос үйлдвэрлэлд нэвтрүүлж мэс заслын хутга хийдэг байсан зэврэлтэд өндөр тэсвэртэй, ир хадгалах чадвар сайтай ган/